યોગ, શારીરિક સ્વાસ્થ્ય સાથે માનસિક સ્વાસ્થ્ય માટે પણ એક લાભદાયી ક્રિયા છે. ગુજરાત રાજ્ય યોગ બોર્ડે કોઇ પણ ઉંમર, જાતિ અથવા સામાજિક દરજ્જો ધરાવતા દરેક વ્યક્તિ સુધી યોગને પહોંચાડવાનો સંકલ્પ કર્યો છે. ગુજરાત રાજ્ય યોગ બોર્ડની યાત્રા યોગના પ્રચારક અને પ્રખર હિમાયતી ભારતના માનનીય વડાપ્રધાન શ્રી નરેન્દ્ર મોદીના વિઝનથી પ્રેરિત છે. ગુજરાત રાજ્ય યોગ બોર્ડ વડાપ્રધાનશ્રીના વિઝનને અનુરૂપ રાજ્યભરમાં વિવિધ પ્રકારના કાર્યક્રમોના માધ્યમે યોગ અંગે લોકોને જાગૃત અને પ્રોત્સાહિત કરવા માટે પ્રતિબદ્ધ છે. ગુજરાત રાજ્ય યોગ બોર્ડ દ્વારા થતાં વિવિધ પ્રકારના કાર્યક્રમો અને પહેલનો ઉદ્દેશ્ય વ્યક્તિથી લઇને સમાજને યોગ માટે માહિતગાર કરવા, પ્રેરિત કરવા અને તેમને મદદ કરવાનો છે.

ગુજરાત રાજ્ય યોગ બોર્ડ, યોગ પ્રશિક્ષકો માટે શ્રેષ્ઠ પ્રશિક્ષણ અને પ્રમાણપત્રો કાર્યક્રમના (સર્ટિફિકેશન પ્રોગ્રામ્સ) આયોજન પર ખાસ ભાર મૂકે છે. આ કાર્યક્રમો ખાસ પ્રકારે તૈયાર કરવામાં આવ્યા છે, જેમાં પ્રશિક્ષકને સલામત પદ્ધતિ અને અસરકારક રીતે યોગની પ્રશિક્ષણ આપવા માટેનું જ્ઞાન આપવામાં આવે છે, સાથે જ યોગ પ્રશિક્ષણના ક્ષેત્રે સર્વોચ્ચ માપદંડો જળવાય તેનું પણ ધ્યાન રાખવામાં આવે છે. વ્યક્તિગત રીતે યોગમાં ઊંડાણપૂર્વકનું જ્ઞાન મેળવવા ઇચ્છતા સૌ માટે ગુજરાત રાજ્ય યોગ બોર્ડ દ્વારા અનેક કાર્યશાળા, પરિષદ અને પ્રશિક્ષણ વર્ગોનું આયોજન કરવામાં આવે છે. આ કાર્યક્રમો પ્રારંભિકથી લઈને યોગમાં ઉચ્ચ પ્રશિક્ષણ મેળવવાની ઈચ્છા ધરાવતા વ્યક્તિઓની આવશ્યક્તાઓને પૂરી પાડે છે, સાથે જ આસન, પ્રાણાયામ, ધ્યાન અને તત્વજ્ઞાન જેવા વિષયોને પણ આ કાર્યક્રમોમાં આવરી લેવામાં આવે છે.